Området

Gjuvslandslia – landskapsvernområde
Er eit 199 dekar stort område som ligg vakkert til på austsida av øya mellom Gjuvsland og Åkre. Landskapsvernområdet strekker seg frå Hardangerfjorden og opp til 197 meters høgd. Verneområdet vart oppretta ved kongeleg resolusjon i 2000, med bakgrunn i at vi her finn eitt av landets aller viktigaste område for barlind. Ein reknar med at det veks mellom 1000 og 1500 tre av denne arten her, som har status som sårbar på den norske raudlista. Store deler av området er kulturmark, og vart i 2008 vald som utvald kulturlandskap for Hordaland. Ei utbreidd plante på heile Varaldsøy er kublomen, som og er fylkesblom i Hordaland. Her finn ein og nasjonalblomen bergfrue. Her er gamle slåttemarker med mange vakre og sjeldne blomar og planter.

På øya er det geologiske mangfaldet stort, berggrunnen inneheld store mengder grønskifer og det var i dette skiferlaget ein fann rike førekomstar av svovelkis og koparkis. Det vart på slutten av 1800 talet utvunne over 160000 tonn svovelkis- det meste med handkraft.

Det er merka tursti til dei nedlagte svovelkisgruvene på Valaheiane, dette er ein lett og spennande tur for heile familien. Her finn ein murar og restar etter det gamle gruvesamfunnet.

Ferjevågen badeplass
Dette friområdet finn du på søraustsida av øya, ei langrunn sandstrand omgitt av fine svaberg. Dette er kanskje ein av dei flottaste og mest barnevenlege badeplassane i heile Hardangerfjorden.

Varaldsøy kyrkje
I 1885 stod den kvitmalte trekyrkja ferdig. Den ligg vakkert til midt i bygda, og er den største kyrkja i Kvinnherad.

Varaldsøy idrettslag
Varaldsøy idrettslag har kanoar som kan leigast.